ഇടുക്കി ഡാമിൽ നിന്നും ഒഴുക്കുന്ന വെള്ളത്തിന്‍റെ അളവ് കൂട്ടി

ചെറുതോണി: ഇടുക്കി ജലസംഭരണിയുടെ ഭാഗമായ ചെറുതോണി അണക്കെട്ടിന്‍റെ ഷട്ടറുകൾ വീണ്ടും ഉയർത്തി. ഉച്ചക്ക് രണ്ട് മണിയോടെ ചെറുതോണി അണക്കെട്ടിന്റെ 2, 3, 4 ഷട്ടറുകൾ 100 സെന്റി മീറ്റർ വീതമാണ് ഉയർത്തിയത്. ഷട്ടർ അധികമായി ഉയർത്തിയത് വഴി സെക്കൻഡിൽ 3 ലക്ഷം ലിറ്റർ വരെ വെള്ളം പുറത്തേക്കൊഴുകും.

ഇടുക്കി അണക്കെട്ടിന്‍റെ വൃഷ്ടി പ്രദേശത്ത് ശക്തമായ മഴ തുടരുന്നതും മുല്ലപ്പെരിയാർ അണക്കെട്ടിൽ നിന്ന് സ്പിൽവേയിലൂടെ ഒഴുക്കുന്ന വെളളത്തിന്റെ അളവ് വർധിച്ചതും വഴി ഇടുക്കി ജലസംഭരണിയിലെ ജലനിരപ്പ് കൂടി വരികയാണ്. ഈ സാഹചര്യത്തിലാണ് ഷട്ടർ വീണ്ടും ഉ‍യർത്താൻ തീരുമാനിച്ചത്.