ഷിയോ മൂന്നാമൻ ജോര്‍ജിയയിലെ ഓര്‍ത്തഡോക്സ് സഭയുടെ പുതിയ കാതോലിക്കോസ് - പാത്രിയര്‍ക്കീസ്

57 വർഷങ്ങള്‍ക്ക് മുമ്പ് ടിബിലിസിയില്‍ ജനിച്ച എലിസ്ബാർ ടെയ്മുറാസ് മുജിരി വളരെക്കാലം പാത്രിയാർക്കല്‍ സ്ഥാനത്തിന്റെ ലോക്കം ടെനൻസായി സേവനമനുഷ്ഠിച്ചിരുന്നു.

അദ്ദേഹം ഷിയോ മൂന്നാമൻ എന്ന പേര് സ്വീകരിക്കുകയും മത്സ്ഖെറ്റ-ടിബിലിസിയുടെ ആർച്ച്‌ ബിഷപ്പ്, അബ്ഖാസിയയുടെയും ബിച്വിന്റയുടെയും മെട്രോപൊളിറ്റൻ എന്നീ സ്ഥാനങ്ങളും അദ്ദേഹം വഹിക്കും. ജോർജിയയുടെ തലസ്ഥാനമായ ടിബിലിസിയുടെ ഹോളി ട്രിനിറ്റി കത്തീഡ്രലില്‍ നടന്ന സിനഡ് യോഗത്തില്‍ ജോർജിയയിലുടനീളമുള്ള 1,200 പ്രതിനിധികള്‍ പങ്കെടുത്തു. മെയ് 12 ചൊവ്വാഴ്ച രാവിലെ സ്വെറ്റിറ്റ്‌സ്‌കോവെലി കത്തീഡ്രലിലാണ് സിംഹാസനാരോഹണ ചടങ്ങ് നടന്നത്.

സ്റ്റേറ്റ് കണ്‍സർവേറ്ററിയില്‍ നിന്ന് സെല്ലോ പ്രകടനത്തില്‍ ഡിപ്ലോമ നേടിയ മുജിരി, 1993 ല്‍ ഷിയോ എന്ന പേരില്‍ സന്യാസിയായി. പിന്നീട് അദ്ദേഹം ഒരു ഡീക്കനായും 1996-ല്‍ ഒരു പുരോഹിതനായും നിയമിതനായി. മോസ്കോയില്‍ ദൈവശാസ്ത്ര പഠനം പൂർത്തിയാക്കിയ അദ്ദേഹം ടിബിലിസിയില്‍ ഒരു മഠാധിപതിയും പിന്നീട് ബിഷപ്പും, ആർച്ച്‌ ബിഷപ്പും, മെത്രാപ്പോലീത്തായും ആയി.