30 ന് വാഴക്കുളം സഹകരണ ബാങ്ക് ഓഡിറ്റോറിയത്തിൽ പൈനാപ്പിൾ ഫെസ്റ്റ്

മൂവാറ്റുപുഴഃ പൈനാപ്പിൾ ഫാർമേഴ്സ് അസോസിയേഷൻ നേതൃത്വത്തിൽ 30 ന് വാഴക്കുളം സഹകരണ ബാങ്ക് ഓഡിറ്റോറിയത്തിൽ പൈനാപ്പിൾ ഫെസ്റ്റ് സംഘടിപ്പിക്കും.

ഫെസ്റ്റിനോടനുബന്ധിച്ച് പൈനാപ്പിൾ പാചകമത്സരം, വിള മത്സരം, കാർഷിക സെമിനാർ, പൊതുസമ്മേളനം, പൈനാപ്പിൾ ശ്രീ അവാർഡ് ദാനം തുടങ്ങിയ പരിപാടികൾ സംഘടിപ്പിക്കുമെന്ന് ഭാരവാഹികളായ ജയിംസ് ജോർജ്, ജോജോ ജോസഫ് എന്നിവർ വാർത്താസമ്മേളനത്തിൽ അറിയിച്ചു. ഉച്ചകഴിഞ്ഞ് രണ്ടിന് പൈനാപ്പിൾ പാചക മത്സരം, വിള മത്സരം എന്നിവയുടെ രജിസ്ട്രേഷൻ ആരംഭിക്കും. വൈകീട്ട് 3.30 ന് ചെടികൾ പുഷ്പിക്കാത്തതും രാസവളപ്രയോഗവും എന്ന വിഷയത്തിൽ ഡോ. മായ.ടി.യുടെ നേതൃത്വത്തിൽ കാർഷിക സെമിനാർ ആരംഭിക്കും. വൈകിട്ട് അഞ്ചിന് പൊതുസമ്മേളനം മന്ത്രി റോഷി അഗസ്റ്റിൻ ഉദ്ഘാടനം ചെയ്യും. മാത്യു കുഴൽനാടൻ എംഎൽഎ അധ്യക്ഷത വഹിക്കും. ഡീന്‍ കുര്യാക്കോസ് എം.പി., പി. ജെ.ജോസഫ് എം.എൽ.എ, ജില്ലാ പഞ്ചായത്ത് പ്രസിഡണ്ട് ഉല്ലാസ് തോമസ്, മുൻ എം.എൽ.എ. എൽദോ എബ്രഹാം, വാഴക്കുളം അഗ്രോ പ്രോസസ്സിംഗ് കമ്പനി ചെയർമാൻ അഡ്വ.ജോസ് ടോം,     ബ്ലോക്ക് പഞ്ചായത്ത് പ്രസിഡണ്ട് പ്രഫ. ജോസ് അഗസ്റ്റ്യന്‍ തുടങ്ങിയവർ പ്രസംഗിക്കും. സംസ്ഥാന പൈനാപ്പിൾ ശ്രീ അവാർഡ് ജേതാവ് സത്യൻ കല്ലിങ്കലിനെ ചടങ്ങിൽ ആദരിക്കും.